Therāpadāna 245

Therāpadāna

Tuvaradāyakavagga

Naḷinakesariyattheraapadāna

1 “Jātassarassa vemajjhe,

vasāmi jalakukkuṭo;

Addasāhaṁ devadevaṁ,

gacchantaṁ anilañjase.

2 Tuṇḍena kesariṁ gayha,

vippasannena cetasā;

Buddhassa abhiropesiṁ,

tissassa lokabandhuno.

3 Dvenavute ito kappe,

yaṁ pupphamabhipūjayiṁ;

Duggatiṁ nābhijānāmi,

buddhapūjāyidaṁ phalaṁ.

4 Tesattatimhi kappamhi,

satta kesaranāmakā;

Sattaratanasampannā,

cakkavattī mahabbalā.

5 Paṭisambhidā catasso,

…pe…

kataṁ buddhassa sāsanaṁ”.

6 Itthaṁ sudaṁ āyasmā naḷinakesariyo thero imā gāthāyo abhāsitthāti.

7 Naḷinakesariyattherassāpadānaṁ tatiyaṁ.