Vimānavatthu 44
Vimānavatthu
Itthivimāna
Mañjiṭṭhakavagga
6. Vihāravimānavatthu
1 “Abhikkantena vaṇṇena,
…pe…
osadhī viya tārakā.
2 Tassā te naccamānāya,
aṅgamaṅgehi sabbaso;
Dibbā saddā niccharanti,
savanīyā manoramā.
3 Tassā te naccamānāya,
aṅgamaṅgehi sabbaso;
Dibbā gandhā pavāyanti,
sucigandhā manoramā.
4 Vivattamānā kāyena,
yā veṇīsu piḷandhanā;
Tesaṁ suyyati nigghoso,
tūriye pañcaṅgike yathā.
5 Vaṭaṁsakā vātadhutā,
vātena sampakampitā;
Tesaṁ suyyati nigghoso,
tūriye pañcaṅgike yathā.
6 Yāpi te sirasmiṁ mālā,
sucigandhā manoramā;
Vāti gandho disā sabbā,
rukkho mañjūsako yathā.
7 Ghāyase taṁ sucigandhaṁ,
rūpaṁ passasi amānusaṁ;
Devate pucchitācikkha,
kissa kammassidaṁ phalan”ti.
8 “Sāvatthiyaṁ mayhaṁ sakhī bhadante,
Saṅghassa kāresi mahāvihāraṁ;
Tatthappasannā ahamānumodiṁ,
Disvā agārañca piyañca metaṁ.
9 Tāyeva me suddhanumodanāya,
Laddhaṁ vimānabbhutadassaneyyaṁ;
Samantato soḷasayojanāni,
Vehāyasaṁ gacchati iddhiyā mama.
10 Kūṭāgārā nivesā me,
vibhattā bhāgaso mitā;
Daddallamānā ābhanti,
samantā satayojanaṁ.
11 Pokkharañño ca me ettha,
puthulomanisevitā;
Acchodakā vippasannā,
soṇṇavālukasanthatā.
12 Nānāpadumasañchannā,
puṇḍarīkasamotatā;
Surabhī sampavāyanti,
manuññā māluteritā.
13 Jambuyo panasā tālā,
nāḷikeravanāni ca;
Antonivesane jātā,
nānārukkhā aropimā.
14 Nānātūriyasaṅghuṭṭhaṁ,
accharāgaṇaghositaṁ;
Yopi maṁ supine passe,
sopi vitto siyā naro.
15 Etādisaṁ abbhutadassaneyyaṁ,
Vimānaṁ sabbasopabhaṁ;
Mama kammehi nibbattaṁ,
Alaṁ puññāni kātave”ti.
16 “Tāyeva te suddhanumodanāya,
Laddhaṁ vimānabbhutadassaneyyaṁ;
Yā ceva sā dānamadāsi nārī,
Tassā gatiṁ brūhi kuhiṁ uppannā sā”ti.
17 “Yā sā ahu mayhaṁ sakhī bhadante,
Saṅghassa kāresi mahāvihāraṁ;
Viññātadhammā sā adāsi dānaṁ,
Uppannā nimmānaratīsu devesu.
18 Pajāpatī tassa sunimmitassa,
Acintiyā kammavipākā tassā;
Yametaṁ pucchasi kuhiṁ uppannā sāti,
Taṁ te viyākāsiṁ anaññathā ahaṁ.
19 Tenahaññepi samādapetha,
Saṅghassa dānāni dadātha vittā;
Dhammañca suṇātha pasannamānasā,
Sudullabho laddho manussalābho.
20 Yaṁ maggaṁ maggādhipatī adesayi,
Brahmassaro kañcanasannibhattaco;
Saṅghassa dānāni dadātha vittā,
Mahapphalā yattha bhavanti dakkhiṇā.
21 Ye puggalā aṭṭha sataṁ pasatthā,
Cattāri etāni yugāni honti;
Te dakkhiṇeyyā sugatassa sāvakā,
Etesu dinnāni mahapphalāni.
22 Cattāro ca paṭipannā,
cattāro ca phale ṭhitā;
Esa saṅgho ujubhūto,
paññāsīlasamāhito.
23 Yajamānānaṁ manussānaṁ,
puññapekkhāna pāṇinaṁ;
Karotaṁ opadhikaṁ puññaṁ,
saṅghe dinnaṁ mahapphalaṁ.
24 Eso hi saṅgho vipulo mahaggato,
Esappameyyo udadhīva sāgaro;
Etehi seṭṭhā naravīrasāvakā,
Pabhaṅkarā dhammamudīrayanti.
25 Tesaṁ sudinnaṁ suhutaṁ suyiṭṭhaṁ,
Ye saṅghamuddissa dadanti dānaṁ;
Sā dakkhiṇā saṅghagatā patiṭṭhitā,
Mahapphalā lokavidūna vaṇṇitā.
26 Etādisaṁ yaññamanussarantā,
Ye vedajātā vicaranti loke;
Vineyya maccheramalaṁ samūlaṁ,
Aninditā saggamupenti ṭhānan”ti.
27 Vihāravimānaṁ chaṭṭhaṁ. Bhāṇavāraṁ dutiyaṁ.