Vimānavatthu 51

Vimānavatthu

Purisavimāna

Mahārathavagga

1. Maṇḍūkadevaputtavimānavatthu

1 “Ko me vandati pādāni,

iddhiyā yasasā jalaṁ;

Abhikkantena vaṇṇena,

sabbā obhāsayaṁ disā”ti.

2 “Maṇḍūkohaṁ pure āsiṁ,

udake vārigocaro;

Tava dhammaṁ suṇantassa,

avadhī vacchapālako.

3 Muhuttaṁ cittapasādassa,

iddhiṁ passa yasañca me;

Ānubhāvañca me passa,

vaṇṇaṁ passa jutiñca me.

4 Ye ca te dīghamaddhānaṁ,

dhammaṁ assosuṁ gotama;

Pattā te acalaṭṭhānaṁ,

yattha gantvā na socare”ti.

5 Maṇḍūkadevaputtavimānaṁ paṭhamaṁ.