Yamaka 3

1 Mūlayamaka

1.2 Niddesa

1.2.1. Mūlavāraniddesa

1.2.1.1. Kusalapada nayacatukka

1.2.1.1.1. Mūlanaya

1 Ye keci kusalā dhammā, sabbe te kusalamūlāti? Tīṇeva kusalamūlāni. Avasesā kusalā dhammā na kusalamūlā.

2 Ye vā pana kusalamūlā, sabbe te dhammā kusalāti? Āmantā.

3 Ye keci kusalā dhammā, sabbe te kusalamūlena ekamūlāti? Āmantā.

4 Ye vā pana kusalamūlena ekamūlā, sabbe te dhammā kusalāti?

5 Kusalasamuṭṭhānaṁ rūpaṁ kusalamūlena ekamūlaṁ, na kusalaṁ. Kusalaṁ kusalamūlena ekamūlañceva kusalañca.

6 Ye keci kusalamūlena ekamūlā dhammā, sabbe te kusalamūlena aññamaññamūlāti?

7 Mūlāni yāni ekato uppajjanti kusalamūlāni ekamūlāni ceva aññamaññamūlāni ca. Avasesā kusalamūlasahajātā dhammā kusalamūlena ekamūlā, na ca aññamaññamūlā.

8 Ye vā pana kusalamūlena aññamaññamūlā, sabbe te dhammā kusalāti? Āmantā.

1.2.1.1.2. Mūlamūlanaya

9 Ye keci kusalā dhammā, sabbe te kusalamūlamūlāti? Tīṇeva kusalamūlamūlāni. Avasesā kusalā dhammā na kusalamūlamūlā.

10 Ye vā pana kusalamūlamūlā, sabbe te dhammā kusalāti? Āmantā.

11 Ye keci kusalā dhammā, sabbe te kusalamūlena ekamūlamūlāti? Āmantā.

12 Ye vā pana kusalamūlena ekamūlamūlā, sabbe te dhammā kusalāti?

13 Kusalasamuṭṭhānaṁ rūpaṁ kusalamūlena ekamūlamūlaṁ, na kusalaṁ. Kusalaṁ kusalamūlena ekamūlamūlañceva kusalañca.

14 Ye keci kusalamūlena ekamūlamūlā dhammā, sabbe te kusalamūlena aññamaññamūlamūlāti?

15 Mūlāni yāni ekato uppajjanti kusalamūlāni ekamūlamūlāni ceva aññamaññamūlamūlāni ca. Avasesā kusalamūlasahajātā dhammā kusalamūlena ekamūlamūlā, na ca aññamaññamūlamūlā.

16 Ye vā pana kusalamūlena aññamaññamūlamūlā, sabbe te dhammā kusalāti? Āmantā.

1.2.1.1.3. Mūlakanaya

17 Ye keci kusalā dhammā, sabbe te kusalamūlakāti? Āmantā.

18 Ye vā pana kusalamūlakā, sabbe te dhammā kusalāti?

19 Kusalasamuṭṭhānaṁ rūpaṁ kusalamūlakaṁ na kusalaṁ. Kusalaṁ kusalamūlakañceva kusalañca.

20 Ye keci kusalā dhammā, sabbe te kusalamūlena ekamūlakāti? Āmantā.

21 Ye vā pana kusalamūlena ekamūlakā, sabbe te dhammā kusalāti?

22 Kusalasamuṭṭhānaṁ rūpaṁ kusalamūlena ekamūlakaṁ, na kusalaṁ. Kusalaṁ kusalamūlena ekamūlakañceva kusalañca.

23 Ye keci kusalamūlena ekamūlakā dhammā, sabbe te kusalamūlena aññamaññamūlakāti?

24 Mūlāni yāni ekato uppajjanti kusalamūlāni ekamūlakāni ceva aññamaññamūlakāni ca. Avasesā kusalamūlasahajātā dhammā kusalamūlena ekamūlakā, na ca aññamaññamūlakā.

25 Ye vā pana kusalamūlena aññamaññamūlakā, sabbe te dhammā kusalāti? Āmantā.

1.2.1.1.4. Mūlamūlakanaya

26 Ye keci kusalā dhammā, sabbe te kusalamūlamūlakāti? Āmantā.

27 Ye vā pana kusalamūlamūlakā, sabbe te dhammā kusalāti?

28 Kusalasamuṭṭhānaṁ rūpaṁ kusalamūlamūlakaṁ na kusalaṁ. Kusalaṁ kusalamūlamūlakañceva kusalañca.

29 Ye keci kusalā dhammā, sabbe te kusalamūlena ekamūlamūlakāti? Āmantā.

30 Ye vā pana kusalamūlena ekamūlamūlakā, sabbe te dhammā kusalāti?

31 Kusalasamuṭṭhānaṁ rūpaṁ kusalamūlena ekamūlamūlakaṁ, na kusalaṁ. Kusalaṁ kusalamūlena ekamūlamūlakañceva kusalañca.

32 Ye keci kusalamūlena ekamūlamūlakā dhammā, sabbe te kusalamūlena aññamaññamūlamūlakāti?

33 Mūlāni yāni ekato uppajjanti kusalamūlāni ekamūlamūlakāni ceva aññamaññamūlamūlakāni ca. Avasesā kusalamūlasahajātā dhammā kusalamūlena ekamūlamūlakā, na ca aññamaññamūlamūlakā.

34 Ye vā pana kusalamūlena aññamaññamūlamūlakā, sabbe te dhammā kusalāti? Āmantā.

1.2.1.2. Akusalapada nayacatukka

1.2.1.2.1. Mūlanaya

35 Ye keci akusalā dhammā, sabbe te akusalamūlāti?

36 Tīṇeva akusalamūlāni. Avasesā akusalā dhammā na akusalamūlā.

37 Ye vā pana akusalamūlā, sabbe te dhammā akusalāti? Āmantā.

38 Ye keci akusalā dhammā, sabbe te akusalamūlena ekamūlāti?

39 Ahetukaṁ akusalaṁ akusalamūlena na ekamūlaṁ. Sahetukaṁ akusalaṁ akusalamūlena ekamūlaṁ.

40 Ye vā pana akusalamūlena ekamūlā, sabbe te dhammā akusalāti?

41 Akusalasamuṭṭhānaṁ rūpaṁ akusalamūlena ekamūlaṁ, na akusalaṁ. Akusalaṁ akusalamūlena ekamūlañceva akusalañca.

42 Ye keci akusalamūlena ekamūlā dhammā, sabbe te akusalamūlena aññamaññamūlāti?

43 Mūlāni yāni ekato uppajjanti akusalamūlāni ekamūlāni ceva aññamaññamūlāni ca. Avasesā akusalamūlasahajātā dhammā akusalamūlena ekamūlā, na ca aññamaññamūlā.

44 Ye vā pana akusalamūlena aññamaññamūlā, sabbe te dhammā akusalāti? Āmantā.

1.2.1.2.2. Mūlamūlanaya

45 Ye keci akusalā dhammā, sabbe te akusalamūlamūlāti?

46 Tīṇeva akusalamūlamūlāni. Avasesā akusalā dhammā na akusalamūlamūlā.

47 Ye vā pana akusalamūlamūlā, sabbe te dhammā akusalāti? Āmantā.

48 Ye keci akusalā dhammā, sabbe te akusalamūlena ekamūlamūlāti?

49 Ahetukaṁ akusalaṁ akusalamūlena na ekamūlamūlaṁ. Sahetukaṁ akusalaṁ akusalamūlena ekamūlamūlaṁ.

50 Ye vā pana akusalamūlena ekamūlamūlā, sabbe te dhammā akusalāti?

51 Akusalasamuṭṭhānaṁ rūpaṁ akusalamūlena ekamūlamūlaṁ, na akusalaṁ. Akusalaṁ akusalamūlena ekamūlamūlañceva akusalañca.

52 Ye keci akusalamūlena ekamūlamūlā dhammā, sabbe te akusalamūlena aññamaññamūlamūlāti?

53 Mūlāni yāni ekato uppajjanti akusalamūlāni ekamūlamūlāni ceva aññamaññamūlamūlāni ca. Avasesā akusalamūlasahajātā dhammā akusalamūlena ekamūlamūlā, na ca aññamaññamūlamūlā.

54 Ye vā pana akusalamūlena aññamaññamūlamūlā, sabbe te dhammā akusalāti? Āmantā.

1.2.1.2.3. Mūlakanaya

55 Ye keci akusalā dhammā, sabbe te akusalamūlakāti?

56 Ahetukaṁ akusalaṁ na akusalamūlakaṁ. Sahetukaṁ akusalaṁ akusalamūlakaṁ.

57 Ye vā pana akusalamūlakā, sabbe te dhammā akusalāti?

58 Akusalasamuṭṭhānaṁ rūpaṁ akusalamūlakaṁ na akusalaṁ. Akusalaṁ akusalamūlakañceva akusalañca.

59 Ye keci akusalā dhammā, sabbe te akusalamūlena ekamūlakāti?

60 Ahetukaṁ akusalaṁ akusalamūlena na ekamūlakaṁ. Sahetukaṁ akusalaṁ akusalamūlena ekamūlakaṁ.

61 Ye vā pana akusalamūlena ekamūlakā, sabbe te dhammā akusalāti?

62 Akusalasamuṭṭhānaṁ rūpaṁ akusalamūlena ekamūlakaṁ, na akusalaṁ. Akusalaṁ akusalamūlena ekamūlakañceva akusalañca.

63 Ye keci akusalamūlena ekamūlakā dhammā, sabbe te akusalamūlena aññamaññamūlakāti?

64 Mūlāni yāni ekato uppajjanti akusalamūlāni ekamūlakāni ceva aññamaññamūlakāni ca. Avasesā akusalamūlasahajātā dhammā akusalamūlena ekamūlakā, na ca aññamaññamūlakā.

65 Ye vā pana akusalamūlena aññamaññamūlakā, sabbe te dhammā akusalāti? Āmantā.

1.2.1.2.4. Mūlamūlakanaya

66 Ye keci akusalā dhammā, sabbe te akusalamūlamūlakāti?

67 Ahetukaṁ akusalaṁ na akusalamūlamūlakaṁ. Sahetukaṁ akusalaṁ akusalamūlamūlakaṁ.

68 Ye vā pana akusalamūlamūlakā, sabbe te dhammā akusalāti?

69 Akusalasamuṭṭhānaṁ rūpaṁ akusalamūlamūlakaṁ na akusalaṁ. Akusalaṁ akusalamūlamūlakañceva akusalañca.

70 Ye keci akusalā dhammā, sabbe te akusalamūlena ekamūlamūlakāti?

71 Ahetukaṁ akusalaṁ akusalamūlena na ekamūlamūlakaṁ. Sahetukaṁ akusalaṁ akusalamūlena ekamūlamūlakaṁ.

72 Ye vā pana akusalamūlena ekamūlamūlakā, sabbe te dhammā akusalāti?

73 Akusalasamuṭṭhānaṁ rūpaṁ akusalamūlena ekamūlamūlakaṁ, na akusalaṁ. Akusalaṁ akusalamūlena ekamūlamūlakañceva akusalañca.

74 Ye keci akusalamūlena ekamūlamūlakā dhammā, sabbe te akusalamūlena aññamaññamūlamūlakāti?

75 Mūlāni yāni ekato uppajjanti akusalamūlāni ekamūlamūlakāni ceva aññamaññamūlamūlakāni ca. Avasesā akusalamūlasahajātā dhammā akusalamūlena ekamūlamūlakā, na ca aññamaññamūlamūlakā.

76 Ye vā pana akusalamūlena aññamaññamūlamūlakā, sabbe te dhammā akusalāti? Āmantā.

1.2.1.3. Abyākatapada nayacatukka

1.2.1.3.1. Mūlanaya

77 Ye keci abyākatā dhammā, sabbe te abyākatamūlāti?

78 Tīṇeva abyākatamūlāni. Avasesā abyākatā dhammā na abyākatamūlā.

79 Ye vā pana abyākatamūlā, sabbe te dhammā abyākatāti? Āmantā.

80 Ye keci abyākatā dhammā, sabbe te abyākatamūlena ekamūlāti?

81 Ahetukaṁ abyākataṁ abyākatamūlena na ekamūlaṁ. Sahetukaṁ abyākataṁ abyākatamūlena ekamūlaṁ.

82 Ye vā pana abyākatamūlena ekamūlā, sabbe te dhammā abyākatāti? Āmantā.

83 Ye keci abyākatamūlena ekamūlā dhammā, sabbe te abyākatamūlena aññamaññamūlāti?

84 Mūlāni yāni ekato uppajjanti abyākatamūlāni ekamūlāni ceva aññamaññamūlāni ca. Avasesā abyākatamūlasahajātā dhammā abyākatamūlena ekamūlā, na ca aññamaññamūlā.

85 Ye vā pana abyākatamūlena aññamaññamūlā, sabbe te dhammā abyākatāti? Āmantā.

1.2.1.3.2. Mūlamūlanaya

86 Ye keci abyākatā dhammā, sabbe te abyākatamūlamūlāti?

87 Tīṇeva abyākatamūlamūlāni. Avasesā abyākatā dhammā na abyākatamūlamūlā.

88 Ye vā pana abyākatamūlamūlā, sabbe te dhammā abyākatāti? Āmantā.

89 Ye keci abyākatā dhammā, sabbe te abyākatamūlena ekamūlamūlāti?

90 Ahetukaṁ abyākataṁ abyākatamūlena na ekamūlamūlaṁ. Sahetukaṁ abyākataṁ abyākatamūlena ekamūlamūlaṁ.

91 Ye vā pana abyākatamūlena ekamūlamūlā, sabbe te dhammā abyākatāti? Āmantā.

92 Ye keci abyākatamūlena ekamūlamūlā dhammā, sabbe te abyākatamūlena aññamaññamūlamūlāti?

93 Mūlāni yāni ekato uppajjanti abyākatamūlāni ekamūlamūlāni ceva aññamaññamūlamūlāni ca. Avasesā abyākatamūlasahajātā dhammā abyākatamūlena ekamūlamūlā, na ca aññamaññamūlamūlā.

94 Ye vā pana abyākatamūlena aññamaññamūlamūlā, sabbe te dhammā abyākatāti? Āmantā.

1.2.1.3.3. Mūlakanaya

95 Ye keci abyākatā dhammā, sabbe te abyākatamūlakāti?

96 Ahetukaṁ abyākataṁ na abyākatamūlakaṁ. Sahetukaṁ abyākataṁ abyākatamūlakaṁ.

97 Ye vā pana abyākatamūlakā, sabbe te dhammā abyākatāti? Āmantā.

98 Ye keci abyākatā dhammā, sabbe te abyākatamūlena ekamūlakāti?

99 Ahetukaṁ abyākataṁ abyākatamūlena na ekamūlakaṁ. Sahetukaṁ abyākataṁ abyākatamūlena ekamūlakaṁ.

100 Ye vā pana abyākatamūlena ekamūlakā, sabbe te dhammā abyākatāti? Āmantā.

101 Ye keci abyākatamūlena ekamūlakā dhammā, sabbe te abyākatamūlena aññamaññamūlakāti?

102 Mūlāni yāni ekato uppajjanti abyākatamūlāni ekamūlakāni ceva aññamaññamūlakāni ca. Avasesā abyākatamūlasahajātā dhammā abyākatamūlena ekamūlakā, na ca aññamaññamūlakā.

103 Ye vā pana abyākatamūlena aññamaññamūlakā, sabbe te dhammā abyākatāti? Āmantā.

1.2.1.3.4. Mūlamūlakanaya

104 Ye keci abyākatā dhammā, sabbe te abyākatamūlamūlakāti?

105 Ahetukaṁ abyākataṁ na abyākatamūlamūlakaṁ. Sahetukaṁ abyākataṁ abyākatamūlamūlakaṁ.

106 Ye vā pana abyākatamūlamūlakā, sabbe te dhammā abyākatāti? Āmantā.

107 Ye keci abyākatā dhammā, sabbe te abyākatamūlena ekamūlamūlakāti?

108 Ahetukaṁ abyākataṁ abyākatamūlena na ekamūlamūlakaṁ. Sahetukaṁ abyākataṁ abyākatamūlena ekamūlamūlakaṁ.

109 Ye vā pana abyākatamūlena ekamūlamūlakā, sabbe te dhammā abyākatāti? Āmantā.

110 Ye keci abyākatamūlena ekamūlamūlakā dhammā, sabbe te abyākatamūlena aññamaññamūlamūlakāti?

111 Mūlāni yāni ekato uppajjanti abyākatamūlāni ekamūlamūlakāni ceva aññamaññamūlamūlakāni ca. Avasesā abyākatamūlasahajātā dhammā abyākatamūlena ekamūlamūlakā, na ca aññamaññamūlamūlakā.

112 Ye vā pana abyākatamūlena aññamaññamūlamūlakā, sabbe te dhammā abyākatāti? Āmantā.

1.2.1.4. Nāmapada nayacatukka

1.2.1.4.1. Mūlanaya

113 Ye keci nāmā dhammā, sabbe te nāmamūlāti?

114 Naveva nāmamūlāni. Avasesā nāmā dhammā na nāmamūlā.

115 Ye vā pana nāmamūlā, sabbe te dhammā nāmāti? Āmantā.

116 Ye keci nāmā dhammā, sabbe te nāmamūlena ekamūlāti?

117 Ahetukaṁ nāmaṁ nāmamūlena na ekamūlaṁ. Sahetukaṁ nāmaṁ nāmamūlena ekamūlaṁ.

118 Ye vā pana nāmamūlena ekamūlā, sabbe te dhammā nāmāti?

119 Nāmasamuṭṭhānaṁ rūpaṁ nāmamūlena ekamūlaṁ, na nāmaṁ. Nāmaṁ nāmamūlena ekamūlañceva nāmañca.

120 Ye keci nāmamūlena ekamūlā dhammā, sabbe te nāmamūlena aññamaññamūlāti?

121 Mūlāni yāni ekato uppajjanti nāmamūlāni ekamūlāni ceva aññamaññamūlāni ca. Avasesā nāmamūlasahajātā dhammā nāmamūlena ekamūlā, na ca aññamaññamūlā.

122 Ye vā pana nāmamūlena aññamaññamūlā, sabbe te dhammā nāmāti? Āmantā.

1.2.1.4.2. Mūlamūlanaya

123 Ye keci nāmā dhammā, sabbe te nāmamūlamūlāti?

124 Naveva nāmamūlamūlāni. Avasesā nāmā dhammā na nāmamūlamūlā.

125 Ye vā pana nāmamūlamūlā, sabbe te dhammā nāmāti? Āmantā.

126 Ye keci nāmā dhammā, sabbe te nāmamūlena ekamūlamūlāti?

127 Ahetukaṁ nāmaṁ nāmamūlena na ekamūlamūlaṁ. Sahetukaṁ nāmaṁ nāmamūlena ekamūlamūlaṁ.

128 Ye vā pana nāmamūlena ekamūlamūlā, sabbe te dhammā nāmāti?

129 Nāmasamuṭṭhānaṁ rūpaṁ nāmamūlena ekamūlamūlaṁ, na nāmaṁ. Nāmaṁ nāmamūlena ekamūlamūlañceva nāmañca.

130 Ye keci nāmamūlena ekamūlamūlā dhammā, sabbe te nāmamūlena aññamaññamūlamūlāti?

131 Mūlāni yāni ekato uppajjanti nāmamūlāni ekamūlamūlāni ceva aññamaññamūlamūlāni ca. Avasesā nāmamūlasahajātā dhammā nāmamūlena ekamūlamūlā, na ca aññamaññamūlamūlā.

132 Ye vā pana nāmamūlena aññamaññamūlamūlā, sabbe te dhammā nāmāti? Āmantā.

1.2.1.4.3. Mūlakanaya

133 Ye keci nāmā dhammā, sabbe te nāmamūlakāti?

134 Ahetukaṁ nāmaṁ na nāmamūlakaṁ. Sahetukaṁ nāmaṁ nāmamūlakaṁ.

135 Ye vā pana nāmamūlakā, sabbe te dhammā nāmāti?

136 Nāmasamuṭṭhānaṁ rūpaṁ nāmamūlakaṁ, na nāmaṁ. Nāmaṁ nāmamūlakañceva nāmañca.

137 Ye keci nāmā dhammā, sabbe te nāmamūlena ekamūlakāti?

138 Ahetukaṁ nāmaṁ nāmamūlena na ekamūlakaṁ. Sahetukaṁ nāmaṁ nāmamūlena ekamūlakaṁ.

139 Ye vā pana nāmamūlena ekamūlakā, sabbe te dhammā nāmāti?

140 Nāmasamuṭṭhānaṁ rūpaṁ nāmamūlena ekamūlakaṁ, na nāmaṁ. Nāmaṁ nāmamūlena ekamūlakañceva nāmañca.

141 Ye keci nāmamūlena ekamūlakā dhammā, sabbe te nāmamūlena aññamaññamūlakāti?

142 Mūlāni yāni ekato uppajjanti nāmamūlāni ekamūlakāni ceva aññamaññamūlakāni ca. Avasesā nāmamūlasahajātā dhammā nāmamūlena ekamūlakā, na ca aññamaññamūlakā.

143 Ye vā pana nāmamūlena aññamaññamūlakā, sabbe te dhammā nāmāti? Āmantā.

1.2.1.4.4. Mūlamūlakanaya

144 Ye keci nāmā dhammā, sabbe te nāmamūlamūlakāti?

145 Ahetukaṁ nāmaṁ na nāmamūlamūlakaṁ. Sahetukaṁ nāmaṁ nāmamūlamūlakaṁ.

146 Ye vā pana nāmamūlamūlakā, sabbe te dhammā nāmāti?

147 Nāmasamuṭṭhānaṁ rūpaṁ nāmamūlamūlakaṁ, na nāmaṁ. Nāmaṁ nāmamūlamūlakañceva nāmañca.

148 Ye keci nāmā dhammā, sabbe te nāmamūlena ekamūlamūlakāti?

149 Ahetukaṁ nāmaṁ nāmamūlena na ekamūlamūlakaṁ. Sahetukaṁ nāmaṁ nāmamūlena ekamūlamūlakaṁ.

150 Ye vā pana nāmamūlena ekamūlamūlakā, sabbe te dhammā nāmāti?

151 Nāmasamuṭṭhānaṁ rūpaṁ nāmamūlena ekamūlamūlakaṁ, na nāmaṁ. Nāmaṁ nāmamūlena ekamūlamūlakañceva nāmañca.

152 Ye keci nāmamūlena ekamūlamūlakā dhammā, sabbe te nāmamūlena aññamaññamūlamūlakāti?

153 Mūlāni yāni ekato uppajjanti nāmamūlāni ekamūlamūlakāni ceva aññamaññamūlamūlakāni ca. Avasesā nāmamūlasahajātā dhammā nāmamūlena ekamūlamūlakā, na ca aññamaññamūlamūlakā.

154 Ye vā pana nāmamūlena aññamaññamūlamūlakā, sabbe te dhammā nāmāti? Āmantā.

155 Mūlavāraniddeso.