Therāpadāna 119

Therāpadāna

Mahāparivāravagga

Buddhasaññakattheraapadāna

1 “Yadā vipassī lokaggo,

āyusaṅkhāramossaji;

Pathavī sampakampittha,

medanī jalamekhalā.

2 Otataṁ vitthataṁ mayhaṁ,

suvicittavaṭaṁsakaṁ;

Bhavanampi pakampittha,

buddhassa āyusaṅkhaye.

3 Tāso mayhaṁ samuppanno,

bhavane sampakampite;

Uppādo nu kimatthāya,

āloko vipulo ahu.

4 Vessavaṇo idhāgamma,

nibbāpesi mahājanaṁ;

Pāṇabhūte bhayaṁ natthi,

ekaggā hotha saṁvutā.

5 Aho buddhā aho dhammā,

aho no satthu sampadā;

Yasmiṁ uppajjamānamhi,

pathavī sampakampati.

6 Buddhānubhāvaṁ kittetvā,

kappaṁ saggamhi modahaṁ;

Avasesesu kappesu,

kusalaṁ caritaṁ mayā.

7 Ekanavutito kappe,

yaṁ saññamalabhiṁ tadā;

Duggatiṁ nābhijānāmi,

buddhasaññāyidaṁ phalaṁ.

8 Ito cuddasakappamhi,

rājā āsiṁ patāpavā;

Samito nāma nāmena,

cakkavattī mahabbalo.

9 Paṭisambhidā catasso,

…pe…

kataṁ buddhassa sāsanaṁ”.

10 Itthaṁ sudaṁ āyasmā buddhasaññako thero imā gāthāyo abhāsitthāti.

11 Buddhasaññakattherassāpadānaṁ sattamaṁ.