Therāpadāna 543

Therāpadāna

Bhaddiyavagga

1 Lakuṇḍabhaddiyattheraapadāna

1 “Padumuttaro nāma jino,

sabbadhammesu cakkhumā;

Ito satasahassamhi,

kappe uppajji nāyako.

2 Tadāhaṁ haṁsavatiyaṁ,

seṭṭhiputto mahaddhano;

Jaṅghāvihāraṁ vicaraṁ,

saṅghārāmaṁ agacchahaṁ.

3 Tadā so lokapajjoto,

dhammaṁ desesi nāyako;

Mañjussarānaṁ pavaraṁ,

sāvakaṁ abhikittayi.

4 Taṁ sutvā mudito hutvā,

kāraṁ katvā mahesino;

Vanditvā satthuno pāde,

taṁ ṭhānamabhipatthayiṁ.

5 Tadā buddho viyākāsi,

saṅghamajjhe vināyako;

‘Anāgatamhi addhāne,

lacchase taṁ manorathaṁ.

6 Satasahassito kappe,

okkākakulasambhavo;

Gotamo nāma gottena,

satthā loke bhavissati.

7 Tassa dhammesu dāyādo,

oraso dhammanimmito;

Bhaddiyo nāma nāmena,

hessati satthu sāvako’.

8 Tena kammena sukatena,

cetanāpaṇidhīhi ca;

Jahitvā mānusaṁ dehaṁ,

tāvatiṁsamagacchahaṁ.

9 Dvenavute ito kappe,

phusso uppajji nāyako;

Durāsado duppasaho,

sabbalokuttamo jino.

10 Caraṇena ca sampanno,

brahā uju patāpavā;

Hitesī sabbasattānaṁ,

bahuṁ mocesi bandhanā.

11 Nandārāmavane tassa,

ahosiṁ phussakokilo;

Gandhakuṭisamāsanne,

ambarukkhe vasāmahaṁ.

12 Tadā piṇḍāya gacchantaṁ,

dakkhiṇeyyaṁ jinuttamaṁ;

Disvā cittaṁ pasādetvā,

mañjunābhinikūjahaṁ.

13 Rājuyyānaṁ tadā gantvā,

supakkaṁ kanakattacaṁ;

Ambapiṇḍaṁ gahetvāna,

sambuddhassopanāmayiṁ.

14 Tadā me cittamaññāya,

mahākāruṇiko jino;

Upaṭṭhākassa hatthato,

pattaṁ paggaṇhi nāyako.

15 Adāsiṁ haṭṭhacittohaṁ,

ambapiṇḍaṁ mahāmune;

Patte pakkhippa pakkhehi,

pañjaliṁ katvāna mañjunā.

16 Sarena rajanīyena,

savanīyena vaggunā;

Vassanto buddhapūjatthaṁ,

nīḷaṁ gantvā nipajjahaṁ.

17 Tadā muditacittaṁ maṁ,

buddhapemagatāsayaṁ;

Sakuṇagghi upāgantvā,

ghātayī duṭṭhamānaso.

18 Tato cutohaṁ tusite,

anubhotvā mahāsukhaṁ;

Manussayonimāgacchiṁ,

tassa kammassa vāhasā.

19 Imamhi bhaddake kappe,

brahmabandhu mahāyaso;

Kassapo nāma gottena,

uppajji vadataṁ varo.

20 Sāsanaṁ jotayitvā so,

abhibhuyya kutitthiye;

Vinayitvāna veneyye,

nibbuto so sasāvako.

21 Nibbute tamhi lokagge,

pasannā janatā bahū;

Pūjanatthāya buddhassa,

thūpaṁ kubbanti satthuno.

22 ‘Sattayojanikaṁ thūpaṁ,

sattaratanabhūsitaṁ;

Karissāma mahesissa’,

iccevaṁ mantayanti te.

23 Kikino kāsirājassa,

tadā senāya nāyako;

Hutvāhaṁ appamāṇassa,

pamāṇaṁ cetiye vadiṁ.

24 Tadā te mama vākyena,

cetiyaṁ yojanuggataṁ;

Akaṁsu naravīrassa,

nānāratanabhūsitaṁ.

25 Tena kammena sukatena,

cetanāpaṇidhīhi ca;

Jahitvā mānusaṁ dehaṁ,

tāvatiṁsamagacchahaṁ.

26 Pacchime ca bhave dāni,

jāto seṭṭhikule ahaṁ;

Sāvatthiyaṁ puravare,

iddhe phīte mahaddhane.

27 Purappavese sugataṁ,

disvā vimhitamānaso;

Pabbajitvāna na ciraṁ,

arahattamapāpuṇiṁ.

28 Cetiyassa pamāṇaṁ yaṁ,

akariṁ tena kammunā;

Lakuṇḍakasarīrohaṁ,

jāto paribhavāraho.

29 Sarena madhurenāhaṁ,

pūjitvā isisattamaṁ;

Mañjussarānaṁ bhikkhūnaṁ,

aggattamanupāpuṇiṁ.

30 Phaladānena buddhassa,

guṇānussaraṇena ca;

Sāmaññaphalasampanno,

viharāmi anāsavo.

31 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

32 Svāgataṁ vata me āsi,

buddhaseṭṭhassa santike;

Tisso vijjā anuppattā,

kataṁ buddhassa sāsanaṁ.

33 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

34 Itthaṁ sudaṁ āyasmā lakuṇḍabhaddiyo thero imā gāthāyo abhāsitthāti.

35 Lakuṇḍabhaddiyattherassāpadānaṁ paṭhamaṁ.