Therāpadāna 391

Therāpadāna

Avaṭaphalavagga

9 Soṇakoṭivīsattheraapadāna

1 “Vipassino pāvacane,

ekaṁ leṇaṁ mayā kataṁ;

Cātuddisassa saṅghassa,

bandhumārājadhāniyā.

2 Dussehi bhūmiṁ leṇassa,

santharitvā pariccajiṁ;

Udaggacitto sumano,

akāsiṁ paṇidhiṁ tadā.

3 Ārādhayeyyaṁ sambuddhaṁ,

pabbajjañca labheyyahaṁ;

Anuttarañca nibbānaṁ,

phuseyyaṁ santimuttamaṁ.

4 Teneva sukkamūlena,

kappe navuti saṁsariṁ;

Devabhūto manusso ca,

katapuñño virocahaṁ.

5 Tato kammāvasesena,

idha pacchimake bhave;

Campāyaṁ aggaseṭṭhissa,

jātomhi ekaputtako.

6 Jātamattassa me sutvā,

pitu chando ayaṁ ahu;

Dadāmahaṁ kumārassa,

vīsakoṭī anūnakā.

7 Caturaṅgulā ca me lomā,

jātā pādatale ubho;

Sukhumā mudusamphassā,

tūlāpicusamā subhā.

8 Atītā navuti kappā,

ayaṁ eko ca uttari;

Nābhijānāmi nikkhitte,

pāde bhūmyā asanthate.

9 Ārādhito me sambuddho,

pabbajiṁ anagāriyaṁ;

Arahattañca me pattaṁ,

sītibhūtomhi nibbuto.

10 Aggo āraddhavīriyānaṁ,

niddiṭṭho sabbadassinā;

Khīṇāsavomhi arahā,

chaḷabhiñño mahiddhiko.

11 Ekanavutito kappe,

yaṁ dānamadadiṁ tadā;

Duggatiṁ nābhijānāmi,

leṇadānassidaṁ phalaṁ.

12 Kilesā jhāpitā mayhaṁ,

…pe…

viharāmi anāsavo.

13 Svāgataṁ vata me āsi,

…pe…

kataṁ buddhassa sāsanaṁ.

14 Paṭisambhidā catasso,

…pe…

kataṁ buddhassa sāsanaṁ”.

15 Thero koṭivīso soṇo,

bhikkhusaṅghassa aggato;

Pañhaṁ puṭṭho viyākāsi,

anotatte mahāsareti.

16 Itthaṁ sudaṁ āyasmā soṇo koṭivīso thero imā gāthāyo abhāsitthāti.

17 Soṇakoṭivīsattherassāpadānaṁ navamaṁ.