Therāpadāna 511

Therāpadāna

Kaṇikāravagga

9 Tālaphaladāyakattheraapadāna

1 “Sataraṁsī nāma bhagavā,

sayambhū aparājito;

Vivekā vuṭṭhahitvāna,

gocarāyābhinikkhami.

2 Phalahattho ahaṁ disvā,

upagacchiṁ narāsabhaṁ;

Pasannacitto sumano,

tālaphalaṁ adāsahaṁ.

3 Catunnavutito kappe,

yaṁ phalaṁ adadiṁ tadā;

Duggatiṁ nābhijānāmi,

phaladānassidaṁ phalaṁ.

4 Kilesā jhāpitā mayhaṁ,

…pe…

viharāmi anāsavo.

5 Svāgataṁ vata me āsi,

…pe…

kataṁ buddhassa sāsanaṁ.

6 Paṭisambhidā catasso,

…pe…

kataṁ buddhassa sāsanaṁ”.

7 Itthaṁ sudaṁ āyasmā tālaphaladāyako thero imā gāthāyo abhāsitthāti.

8 Tālaphaladāyakattherassāpadānaṁ navamaṁ.