Therāpadāna 329

Therāpadāna

Umāpupphiyavagga

Nigguṇḍipupphiyattheraapadāna

1 “Yadā devo devakāyā,

cavate āyusaṅkhayā;

Tayo saddā niccharanti,

devānaṁ anumodataṁ.

2 ‘Ito bho sugatiṁ gaccha,

manussānaṁ sahabyataṁ;

Manussabhūto saddhamme,

labha saddhaṁ anuttaraṁ.

3 Sā te saddhā niviṭṭhāssa,

mūlajātā patiṭṭhitā;

Yāvajīvaṁ asaṁhīrā,

saddhamme suppavedite.

4 Kāyena kusalaṁ katvā,

vācāya kusalaṁ bahuṁ;

Manasā kusalaṁ katvā,

abyāpajjaṁ nirūpadhiṁ.

5 Tato opadhikaṁ puññaṁ,

katvā dānena taṁ bahuṁ;

Aññepi macce saddhamme,

brahmacariye nivesaya’.

6 Imāya anukampāya,

devādevaṁ yadā vidū;

Cavantaṁ anumodanti,

ehi deva punappunaṁ.

7 ‘Saṁvego me tadā āsi,

devasaṅghe samāgate;

Kaṁsu nāma ahaṁ yoniṁ,

gamissāmi ito cuto’.

8 Mama saṁvegamaññāya,

samaṇo bhāvitindriyo;

Mamuddharitukāmo so,

āgacchi mama santikaṁ.

9 Sumano nāma nāmena,

padumuttarasāvako;

Atthadhammānusāsitvā,

saṁvejesi mamaṁ tadā.

10 Dvādasamaṁ bhāṇavāraṁ.

11 Tassāhaṁ vacanaṁ sutvā,

buddhe cittaṁ pasādayiṁ;

Taṁ dhīraṁ abhivādetvā,

tattha kālaṅkato ahaṁ.

12 Upapajjiṁ sa tattheva,

sukkamūlena codito;

Vasanto mātukucchimhi,

puna dhāreti mātuyā.

13 Tamhā kāyā cavitvāna,

tidase upapajjahaṁ;

Etthantare na passāmi,

domanassamahaṁ tadā.

14 Tāvatiṁsā cavitvāna,

mātukucchiṁ samokkamiṁ;

Nikkhamitvāna kucchimhā,

kaṇhasukkaṁ ajānahaṁ.

15 Jātiyā sattavassova,

ārāmaṁ pāvisiṁ ahaṁ;

Gotamassa bhagavato,

sakyaputtassa tādino.

16 Vitthārike pāvacane,

bāhujaññamhi sāsane;

Addasaṁ sāsanakare,

bhikkhavo tattha satthuno.

17 Sāvatthi nāma nagaraṁ,

rājā tatthāsi kosalo;

Rathena nāgayuttena,

upesi bodhimuttamaṁ.

18 Tassāhaṁ nāgaṁ disvāna,

pubbakammaṁ anussariṁ;

Añjaliṁ paggahetvāna,

samayaṁ agamāsahaṁ.

19 Jātiyā sattavassova,

pabbajiṁ anagāriyaṁ;

Yo so buddhaṁ upaṭṭhāsi,

ānando nāma sāvako.

20 Gatimā dhitimā ceva,

satimā ca bahussuto;

Rañño cittaṁ pasādento,

niyyādesi mahājuti.

21 Tassāhaṁ dhammaṁ sutvāna,

pubbakammaṁ anussariṁ;

Tattheva ṭhitako santo,

arahattamapāpuṇiṁ.

22 Ekaṁsaṁ cīvaraṁ katvā,

sire katvāna añjaliṁ;

Sambuddhaṁ abhivādetvā,

imaṁ vācaṁ udīrayiṁ.

23 ‘Padumuttarabuddhassa,

dvipadindassa satthuno;

Nigguṇḍipupphaṁ paggayha,

sīhāsane ṭhapesahaṁ.

24 Tena kammena dvipadinda,

lokajeṭṭha narāsabha;

Pattomhi acalaṁ ṭhānaṁ,

hitvā jayaparājayaṁ’.

25 Pañcavīsasahassamhi,

kappānaṁ manujādhipā;

Abbudanirabbudāni,

aṭṭhaṭṭhāsiṁsu khattiyā.

26 Paṭisambhidā catasso,

…pe…

kataṁ buddhassa sāsanaṁ”.

27 Itthaṁ sudaṁ āyasmā nigguṇḍipupphiyo thero imā gāthāyo abhāsitthāti.

28 Nigguṇḍipupphiyattherassāpadānaṁ sattamaṁ.