Jātaka 315

Jātaka

Catukkanipāta

Pucimandavagga

5. Sabbamaṁsalābhajātaka

1 “Pharusā vata te vācā,

maṁsaṁ yācanako asi;

Kilomasadisī vācā,

kilomaṁ samma dammi te”.

2 “Aṅgametaṁ manussānaṁ,

bhātā loke pavuccati;

Aṅgassa sadisī vācā,

aṅgaṁ samma dadāmi te”.

3 “Tātāti putto vadamāno,

kampeti hadayaṁ pitu;

Hadayassa sadisī vācā,

hadayaṁ samma dammi te”.

4 “Yassa gāme sakhā natthi,

yathāraññaṁ tatheva taṁ;

Sabbassa sadisī vācā,

sabbaṁ samma dadāmi te”ti.

5 Sabbamaṁsalābhajātakaṁ pañcamaṁ.