Jātaka 316

Jātaka

Catukkanipāta

Pucimandavagga

6. Sasapaṇḍitajātaka

1 “Satta me rohitā macchā,

udakā thalamubbhatā;

Idaṁ brāhmaṇa me atthi,

etaṁ bhutvā vane vasa”.

2 “Dussa me khettapālassa,

rattibhattaṁ apābhataṁ;

Maṁsasūlā ca dve godhā,

ekañca dadhivārakaṁ;

Idaṁ brāhmaṇa me atthi,

etaṁ bhutvā vane vasa”.

3 “Ambapakkaṁ dakaṁ sītaṁ,

Sītacchāyā manoramā;

Idaṁ brāhmaṇa me atthi,

Etaṁ bhutvā vane vasa”.

4 “Na sasassa tilā atthi,

Na muggā napi taṇḍulā;

Iminā agginā pakkaṁ,

Mamaṁ bhutvā vane vasā”ti.

5 Sasapaṇḍitajātakaṁ chaṭṭhaṁ.