Vimānavatthu 84

Vimānavatthu

Purisavimāna

Sunikkhittavagga

10. Serīsakavimānavatthu

1 “Suṇotha yakkhassa ca vāṇijāna ca,

Samāgamo yattha tadā ahosi;

Yathā kathaṁ itaritarena cāpi,

Subhāsitaṁ tañca suṇātha sabbe.

2 Yo so ahu rājā pāyāsi nāma,

Bhummānaṁ sahabyagato yasassī;

So modamānova sake vimāne,

Amānuso mānuse ajjhabhāsī”ti.

3 “Vaṅke araññe amanussaṭṭhāne,

Kantāre appodake appabhakkhe;

Suduggame vaṇṇupathassa majjhe,

Vaṅkaṁ bhayā naṭṭhamanā manussā.

4 Nayidha phalā mūlamayā ca santi,

Upādānaṁ natthi kutodha bhakkho;

Aññatra paṁsūhi ca vālukāhi ca,

Tatāhi uṇhāhi ca dāruṇāhi ca.

5 Ujjaṅgalaṁ tattamivaṁ kapālaṁ,

Anāyasaṁ paralokena tulyaṁ;

Luddānamāvāsamidaṁ purāṇaṁ,

Bhūmippadeso abhisattarūpo.

6 Atha tumhe kena vaṇṇena,

Kimāsamānā imaṁ padesaṁ hi;

Anupaviṭṭhā sahasā samecca,

Lobhā bhayā atha vā sampamūḷhā”ti.

7 “Magadhesu aṅgesu ca satthavāhā,

Āropayitvā paṇiyaṁ puthuttaṁ;

Te yāmase sindhusovīrabhūmiṁ,

Dhanatthikā uddayaṁ patthayānā.

8 Divā pipāsaṁ nadhivāsayantā,

Yoggānukampañca samekkhamānā;

Etena vegena āyāma sabbe,

Rattiṁ maggaṁ paṭipannā vikāle.

9 Te duppayātā aparaddhamaggā,

Andhākulā vippanaṭṭhā araññe;

Suduggame vaṇṇupathassa majjhe,

Disaṁ na jānāma pamūḷhacittā.

10 Idañca disvāna adiṭṭhapubbaṁ,

Vimānaseṭṭhañca tavañca yakkha;

Tatuttariṁ jīvitamāsamānā,

Disvā patītā sumanā udaggā”ti.

11 “Pāraṁ samuddassa imañca vaṇṇuṁ,

Vettācaraṁ saṅkupathañca maggaṁ;

Nadiyo pana pabbatānañca duggā,

Puthuddisā gacchatha bhogahetu.

12 Pakkhandiyāna vijitaṁ paresaṁ,

Verajjake mānuse pekkhamānā;

Yaṁ vo sutaṁ vā atha vāpi diṭṭhaṁ,

Accherakaṁ taṁ vo suṇoma tātā”ti.

13 “Itopi accherataraṁ kumāra,

Na no sutaṁ vā atha vāpi diṭṭhaṁ;

Atītamānussakameva sabbaṁ,

Disvā na tappāma anomavaṇṇaṁ.

14 Vehāyasaṁ pokkharañño savanti,

Pahūtamalyā bahupuṇḍarīkā;

Dumā cime niccaphalūpapannā,

Atīva gandhā surabhiṁ pavāyanti.

15 Veḷūriyathambhā satamussitāse,

Silāpavāḷassa ca āyataṁsā;

Masāragallā sahalohitaṅgā,

Thambhā ime jotirasāmayāse.

16 Sahassathambhaṁ atulānubhāvaṁ,

Tesūpari sādhumidaṁ vimānaṁ;

Ratanantaraṁ kañcanavedimissaṁ,

Tapanīyapaṭṭehi ca sādhuchannaṁ.

17 Jambonaduttattamidaṁ sumaṭṭho,

Pāsādasopānaphalūpapanno;

Daḷho ca vaggu ca susaṅgato ca,

Atīva nijjhānakhamo manuñño.

18 Ratanantarasmiṁ bahuannapānaṁ,

Parivārito accharāsaṅgaṇena;

Murajaālambaratūriyaghuṭṭho,

Abhivanditosi thutivandanāya.

19 So modasi nārigaṇappabodhano,

Vimānapāsādavare manorame;

Acintiyo sabbaguṇūpapanno,

Rājā yathā vessavaṇo naḷinyā.

20 Devo nu āsi udavāsi yakkho,

Udāhu devindo manussabhūto;

Pucchanti taṁ vāṇijā satthavāhā,

Ācikkha ko nāma tuvaṁsi yakkho”ti.

21 “Serīsako nāma ahamhi yakkho,

Kantāriyo vaṇṇupathamhi gutto;

Imaṁ padesaṁ abhipālayāmi,

Vacanakaro vessavaṇassa rañño”ti.

22 “Adhiccaladdhaṁ pariṇāmajaṁ te,

Sayaṅkataṁ udāhu devehi dinnaṁ;

Pucchanti taṁ vāṇijā satthavāhā,

Kathaṁ tayā laddhamidaṁ manuññan”ti.

23 “Nādhiccaladdhaṁ na pariṇāmajaṁ me,

Na sayaṅkataṁ na hi devehi dinnaṁ;

Sakehi kammehi apāpakehi,

Puññehi me laddhamidaṁ manuññan”ti.

24 “Kiṁ te vataṁ kiṁ pana brahmacariyaṁ,

Kissa suciṇṇassa ayaṁ vipāko;

Pucchanti taṁ vāṇijā satthavāhā,

Kathaṁ tayā laddhamidaṁ vimānan”ti.

25 “Mamaṁ pāyāsīti ahu samaññā,

Rajjaṁ yadā kārayiṁ kosalānaṁ;

Natthikadiṭṭhi kadariyo pāpadhammo,

Ucchedavādī ca tadā ahosiṁ.

26 Samaṇo ca kho āsi kumārakassapo,

Bahussuto cittakathī uḷāro;

So me tadā dhammakathaṁ abhāsi,

Diṭṭhivisūkāni vinodayī me.

27 Tāhaṁ tassa dhammakathaṁ suṇitvā,

Upāsakattaṁ paṭivedayissaṁ;

Pāṇātipātā virato ahosiṁ,

Loke adinnaṁ parivajjayissaṁ;

Amajjapo no ca musā abhāṇiṁ,

Sakena dārena ca ahosi tuṭṭho.

28 Taṁ me vataṁ taṁ pana brahmacariyaṁ,

Tassa suciṇṇassa ayaṁ vipāko;

Teheva kammehi apāpakehi,

Puññehi me laddhamidaṁ vimānan”ti.

29 “Saccaṁ kirāhaṁsu narā sapaññā,

Anaññathā vacanaṁ paṇḍitānaṁ;

Yahiṁ yahiṁ gacchati puññakammo,

Tahiṁ tahiṁ modati kāmakāmī.

30 Yahiṁ yahiṁ sokapariddavo ca,

Vadho ca bandho ca parikkileso;

Tahiṁ tahiṁ gacchati pāpakammo,

Na muccati duggatiyā kadācīti.

31 Sammūḷharūpova jano ahosi,

Asmiṁ muhutte kalalīkatova;

Janassimassa tuyhañca kumāra,

Appaccayo kena nu kho ahosī”ti.

32 “Ime ca sirīsavanā tātā,

Dibbā gandhā surabhī sampavanti;

Te sampavāyanti imaṁ vimānaṁ,

Divā ca ratto ca tamaṁ nihantvā.

33 Imesañca kho vassasataccayena,

Sipāṭikā phalati ekamekā;

Mānussakaṁ vassasataṁ atītaṁ,

Yadagge kāyamhi idhūpapanno.

34 Disvānahaṁ vassasatāni pañca,

Asmiṁ vimāne ṭhatvāna tātā;

Āyukkhayā puññakkhayā cavissaṁ,

Teneva sokena pamucchitosmī”ti.

35 “Kathaṁ nu soceyya tathāvidho so,

Laddhā vimānaṁ atulaṁ cirāya;

Ye cāpi kho ittaramupapannā,

Te nūna soceyyuṁ parittapuññā”ti.

36 “Anucchaviṁ ovadiyañca me taṁ,

Yaṁ maṁ tumhe peyyavācaṁ vadetha;

Tumhe ca kho tātā mayānuguttā,

Yenicchakaṁ tena paletha sotthin”ti.

37 “Gantvā mayaṁ sindhusovīrabhūmiṁ,

Dhanatthikā uddayaṁ patthayānā;

Yathāpayogā paripuṇṇacāgā,

Kāhāma serīsamahaṁ uḷāran”ti.

38 “Mā ceva serīsamahaṁ akattha,

Sabbañca vo bhavissati yaṁ vadetha;

Pāpāni kammāni vivajjayātha,

Dhammānuyogañca adhiṭṭhahātha.

39 Upāsako atthi imamhi saṅghe,

Bahussuto sīlavatūpapanno;

Saddho ca cāgī ca supesalo ca,

Vicakkhaṇo santusito mutīmā.

40 Sañjānamāno na musā bhaṇeyya,

Parūpaghātāya na cetayeyya;

Vebhūtikaṁ pesuṇaṁ no kareyya,

Saṇhañca vācaṁ sakhilaṁ bhaṇeyya.

41 Sagāravo sappatisso vinīto,

Apāpako adhisīle visuddho;

So mātaraṁ pitarañcāpi jantu,

Dhammena poseti ariyavutti.

42 Maññe so mātāpitūnaṁ kāraṇā,

Bhogāni pariyesati na attahetu;

Mātāpitūnañca yo accayena,

Nekkhammapoṇo carissati brahmacariyaṁ.

43 Ujū avaṅko asaṭho amāyo,

Na lesakappena ca vohareyya;

So tādiso sukatakammakārī,

Dhamme ṭhito kinti labhetha dukkhaṁ.

44 Taṁ kāraṇā pātukatomhi attanā,

Tasmā dhammaṁ passatha vāṇijāse;

Aññatra teniha bhasmī bhavetha,

Andhākulā vippanaṭṭhā araññe;

Taṁ khippamānena lahuṁ parena,

Sukho have sappurisena saṅgamo”ti.

45 “Kiṁ nāma so kiñca karoti kammaṁ,

Kiṁ nāmadheyyaṁ kiṁ pana tassa gottaṁ;

Mayampi naṁ daṭṭhukāmamha yakkha,

Yassānukampāya idhāgatosi;

Lābhā hi tassa yassa tuvaṁ pihesī”ti.

46 “Yo kappako sambhavanāmadheyyo,

Upāsako kocchaphalūpajīvī;

Jānātha naṁ tumhākaṁ pesiyo so,

Mā kho naṁ hīḷittha supesalo so”ti.

47 “Jānāmase yaṁ tvaṁ pavadesi yakkha,

Na kho naṁ jānāma sa edisoti;

Mayampi naṁ pūjayissāma yakkha,

Sutvāna tuyhaṁ vacanaṁ uḷāran”ti.

48 “Ye keci imasmiṁ satthe manussā,

Daharā mahantā athavāpi majjhimā;

Sabbeva te ālambantu vimānaṁ,

Passantu puññānaṁ phalaṁ kadariyā”ti.

49 Te tattha sabbeva “ahaṁ pure”ti,

Taṁ kappakaṁ tattha purakkhatvā;

Sabbeva te ālambiṁsu vimānaṁ,

Masakkasāraṁ viya vāsavassa.

50 Te tattha sabbeva “ahaṁ pure”ti,

Upāsakattaṁ paṭivedayiṁsu;

Pāṇātipātā viratā ahesuṁ,

Loke adinnaṁ parivajjayiṁsu;

Amajjapā no ca musā bhaṇiṁsu,

Sakena dārena ca ahesuṁ tuṭṭhā.

51 Te tattha sabbeva “ahaṁ pure”ti,

Upāsakattaṁ paṭivedayitvā;

Pakkāmi sattho anumodamāno,

Yakkhiddhiyā anumato punappunaṁ.

52 Gantvāna te sindhusovīrabhūmiṁ,

Dhanatthikā uddayaṁ patthayānā;

Yathāpayogā paripuṇṇalābhā,

Paccāgamuṁ pāṭaliputtamakkhataṁ.

53 Gantvāna te saṅgharaṁ sotthivanto,

Puttehi dārehi samaṅgibhūtā;

Ānandī vittā sumanā patītā,

Akaṁsu serīsamahaṁ uḷāraṁ;

Serīsakaṁ te pariveṇaṁ māpayiṁsu.

54 Etādisā sappurisāna sevanā,

Mahatthikā dhammaguṇāna sevanā;

Ekassa atthāya upāsakassa,

Sabbeva sattā sukhitā ahesunti.

55 Serīsakavimānaṁ dasamaṁ.