Vimānavatthu 85

Vimānavatthu

Purisavimāna

Sunikkhittavagga

11. Sunikkhittavimānavatthu

1 “Uccamidaṁ maṇithūṇaṁ vimānaṁ,

Samantato dvādasa yojanāni;

Kūṭāgārā sattasatā uḷārā,

Veḷuriyathambhā rucakatthatā subhā.

2 Tatthacchasi pivasi khādasi ca,

Dibbā ca vīṇā pavadanti vagguṁ;

Dibbā rasā kāmaguṇettha pañca,

Nāriyo ca naccanti suvaṇṇachannā.

3 Kena tetādiso vaṇṇo,

kena te idha mijjhati;

Uppajjanti ca te bhogā,

ye keci manaso piyā.

4 Pucchāmi taṁ deva mahānubhāva,

Manussabhūto kimakāsi puññaṁ;

Kenāsi evaṁ jalitānubhāvo,

Vaṇṇo ca te sabbadisā pabhāsatī”ti.

5 So devaputto attamano,

moggallānena pucchito;

Pañhaṁ puṭṭho viyākāsi,

yassa kammassidaṁ phalaṁ.

6 “Dunnikkhittaṁ mālaṁ sunikkhipitvā,

Patiṭṭhapetvā sugatassa thūpe;

Mahiddhiko camhi mahānubhāvo,

Dibbehi kāmehi samaṅgibhūto.

7 Tena metādiso vaṇṇo,

tena me idha mijjhati;

Uppajjanti ca me bhogā,

ye keci manaso piyā.

8 Akkhāmi te bhikkhu mahānubhāva,

Manussabhūto yamahaṁ akāsiṁ;

Tenamhi evaṁ jalitānubhāvo,

Vaṇṇo ca me sabbadisā pabhāsatī”ti.

9 Sunikkhittavimānaṁ ekādasamaṁ.

Sunikkhittavaggo sattamo.

10 Tassuddānaṁ

11 Dve daliddā vanavihārā,

Bhatako gopālakaṇḍako;

Anekavaṇṇamaṭṭhakuṇḍalī,

Serīsako sunikkhittaṁ;

Purisānaṁ tatiyo vaggo pavuccatīti.

12 Bhāṇavāraṁ catutthaṁ.

13 Vimānavatthupāḷi niṭṭhitā.