Therāpadāna 286

Therāpadāna

Paṇṇadāyakavagga

Ekapupphiyattheraapadāna

1 “Dakkhiṇamhi duvāramhi,

pisāco āsahaṁ tadā;

Addasaṁ virajaṁ buddhaṁ,

pītaraṁsiṁva bhāṇumaṁ.

2 Vipassissa naraggassa,

sabbalokahitesino;

Ekapupphaṁ mayā dinnaṁ,

dvipadindassa tādino.

3 Ekanavutito kappe,

yaṁ pupphamadadiṁ tadā;

Duggatiṁ nābhijānāmi,

buddhapūjāyidaṁ phalaṁ.

4 Paṭisambhidā catasso,

…pe…

kataṁ buddhassa sāsanaṁ”.

5 Itthaṁ sudaṁ āyasmā ekapupphiyo thero imā gāthāyo abhāsitthāti.

6 Ekapupphiyattherassāpadānaṁ catutthaṁ.