Therāpadāna 21

Therāpadāna

Sīhāsaniyavagga

Sopākattheraapadāna

1 “Pabbhāraṁ sodhayantassa,

vipine pabbatuttame;

Siddhattho nāma bhagavā,

āgacchi mama santikaṁ.

2 Buddhaṁ upagataṁ disvā,

lokajeṭṭhassa tādino;

Santharaṁ paññapetvāna,

pupphāsanamadāsahaṁ.

3 Pupphāsane nisīditvā,

siddhattho lokanāyako;

Mamañca gatimaññāya,

aniccatamudāhari.

4 ‘Aniccā vata saṅkhārā,

uppādavayadhammino;

Uppajjitvā nirujjhanti,

tesaṁ vūpasamo sukho’.

5 Idaṁ vatvāna sabbaññū,

lokajeṭṭho narāsabho;

Nabhaṁ abbhuggami vīro,

haṁsarājāva ambare.

6 Sakaṁ diṭṭhiṁ jahitvāna,

bhāvayāniccasaññahaṁ;

Ekāhaṁ bhāvayitvāna,

tattha kālaṁ kato ahaṁ.

7 Dve sampattī anubhotvā,

sukkamūlena codito;

Pacchime bhave sampatte,

sapākayonupāgamiṁ.

8 Agārā abhinikkhamma,

pabbajiṁ anagāriyaṁ;

Jātiyā sattavassohaṁ,

arahattamapāpuṇiṁ.

9 Āraddhavīriyo pahitatto,

Sīlesu susamāhito;

Tosetvāna mahānāgaṁ,

Alatthaṁ upasampadaṁ.

10 Catunnavutito kappe,

yaṁ kammamakariṁ tadā;

Duggatiṁ nābhijānāmi,

pupphadānassidaṁ phalaṁ.

11 Catunnavutito kappe,

yaṁ saññaṁ bhāvayiṁ tadā;

Taṁ saññaṁ bhāvayantassa,

patto me āsavakkhayo.

12 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

13 Itthaṁ sudaṁ āyasmā sopāko thero imā gāthāyo abhāsitthāti.

14 Sopākattherassāpadānaṁ navamaṁ.