Therāpadāna 314

Therāpadāna

Ārakkhadāyakavagga

Bhojanadāyakattheraapadāna

1 “Sujāto sālalaṭṭhīva,

sobhañjanamivuggato;

Indalaṭṭhirivākāse,

virocati sadā jino.

2 Tassa devātidevassa,

vessabhussa mahesino;

Adāsi bhojanamahaṁ,

vippasannena cetasā.

3 Taṁ me buddho anumodi,

sayambhū aparājito;

Bhave nibbattamānamhi,

phalaṁ nibbattatū tava.

4 Ekattiṁse ito kappe,

yaṁ dānamadadiṁ tadā;

Duggatiṁ nābhijānāmi,

bhojanassa idaṁ phalaṁ.

5 Pañcavīse ito kappe,

eko āsiṁ amittako;

Sattaratanasampanno,

cakkavattī mahabbalo.

6 Paṭisambhidā catasso,

…pe…

kataṁ buddhassa sāsanaṁ”.

7 Itthaṁ sudaṁ āyasmā bhojanadāyako thero imā gāthāyo abhāsitthāti.

8 Bhojanadāyakattherassāpadānaṁ dutiyaṁ.