Therāpadāna 50

Therāpadāna

Upālivagga

8 Caṅkamanadāyakattheraapadāna

1 “Atthadassissa munino,

lokajeṭṭhassa tādino;

Iṭṭhakāhi cinitvāna,

caṅkamaṁ kārayiṁ ahaṁ.

2 Uccato pañcaratanaṁ,

caṅkamaṁ sādhumāpitaṁ;

Āyāmato hatthasataṁ,

bhāvanīyyaṁ manoramaṁ.

3 Paṭiggahesi bhagavā,

atthadassī naruttamo;

Hatthena pulinaṁ gayha,

imā gāthā abhāsatha.

4 ‘Iminā pulinadānena,

caṅkamaṁ sukatena ca;

Sattaratanasampannaṁ,

pulinaṁ anubhossati.

5 Tīṇi kappāni devesu,

devarajjaṁ karissati;

Anubhossati sampattiṁ,

accharāhi purakkhato.

6 Manussalokamāgantvā,

rājā raṭṭhe bhavissati;

Tikkhattuṁ cakkavattī ca,

mahiyā so bhavissati’.

7 Aṭṭhārase kappasate,

yaṁ kammamakariṁ tadā;

Duggatiṁ nābhijānāmi,

caṅkamassa idaṁ phalaṁ.

8 Paṭisambhidā catasso,

…pe…

kataṁ buddhassa sāsanaṁ”.

9 Itthaṁ sudaṁ āyasmā caṅkamanadāyako thero imā gāthāyo abhāsitthāti.

10 Caṅkamanadāyakattherassāpadānaṁ aṭṭhamaṁ.