Therāpadāna 4

Therāpadāna

Buddhavagga

Mahāmoggallānattheraapadāna

1 “Anomadassī bhagavā,

lokajeṭṭho narāsabho;

Vihāsi himavantamhi,

devasaṅghapurakkhato.

2 Varuṇo nāma nāmena,

nāgarājā ahaṁ tadā;

Kāmarūpī vikubbāmi,

mahodadhinivāsahaṁ.

3 Saṅgaṇiyaṁ gaṇaṁ hitvā,

tūriyaṁ paṭṭhapesahaṁ;

Sambuddhaṁ parivāretvā,

vādesuṁ accharā tadā.

4 Vajjamānesu tūresu,

devā tūrāni vajjayuṁ;

Ubhinnaṁ saddaṁ sutvāna,

buddhopi sampabujjhatha.

5 Nimantetvāna sambuddhaṁ,

sakaṁ bhavanupāgamiṁ;

Āsanaṁ paññapetvāna,

kālamārocayiṁ ahaṁ.

6 Khīṇāsavasahassehi,

parivuto lokanāyako;

Obhāsento disā sabbā,

bhavanaṁ me upāgami.

7 Upaviṭṭhaṁ mahāvīraṁ,

Devadevaṁ narāsabhaṁ;

Sabhikkhusaṅghaṁ tappesiṁ,

Annapānenahaṁ tadā.

8 Anumodi mahāvīro,

sayambhū aggapuggalo;

Bhikkhusaṅghe nisīditvā,

imā gāthā abhāsatha.

9 Yo so saṅghaṁ apūjesi,

buddhañca lokanāyakaṁ;

Tena cittappasādena,

devalokaṁ gamissati.

10 Sattasattatikkhattuñca,

devarajjaṁ karissati;

Pathabyā rajjaṁ aṭṭhasataṁ,

vasudhaṁ āvasissati.

11 Pañcapaññāsakkhattuñca,

cakkavattī bhavissati;

Bhogā asaṅkhiyā tassa,

uppajjissanti tāvade.

12 Aparimeyye ito kappe,

okkākakulasambhavo;

Gotamo nāma gottena,

satthā loke bhavissati.

13 Nirayā so cavitvāna,

manussataṁ gamissati;

Kolito nāma nāmena,

brahmabandhu bhavissati.

14 So pacchā pabbajitvāna,

kusalamūlena codito;

Gotamassa bhagavato,

dutiyo hessati sāvako.

15 Āraddhavīriyo pahitatto,

Iddhiyā pāramiṁ gato;

Sabbāsave pariññāya,

Nibbāyissatināsavo.

16 Pāpamittopanissāya,

kāmarāgavasaṁ gato;

Mātaraṁ pitarañcāpi,

ghātayiṁ duṭṭhamānaso.

17 Yaṁ yaṁ yonupapajjāmi,

nirayaṁ atha mānusaṁ;

Pāpakammasamaṅgitā,

bhinnasīso marāmahaṁ.

18 Idaṁ pacchimakaṁ mayhaṁ,

carimo vattate bhavo;

Idhāpi ediso mayhaṁ,

maraṇakāle bhavissati.

19 Pavivekamanuyutto,

samādhibhāvanārato;

Sabbāsave pariññāya,

viharāmi anāsavo.

20 Dharaṇimpi sugambhīraṁ,

bahalaṁ duppadhaṁsiyaṁ;

Vāmaṅguṭṭhena khobheyyaṁ,

iddhiyā pāramiṁ gato.

21 Asmimānaṁ na passāmi,

māno mayhaṁ na vijjati;

Sāmaṇere upādāya,

garucittaṁ karomahaṁ.

22 Aparimeyye ito kappe,

yaṁ kammamabhinīhariṁ;

Tāhaṁ bhūmimanuppatto,

pattomhi āsavakkhayaṁ.

23 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

24 Itthaṁ sudaṁ āyasmā mahāmoggallāno thero imā gāthāyo abhāsitthāti.

25 Mahāmoggallānattherassāpadānaṁ dutiyaṁ.