Therāpadāna 35

Therāpadāna

Kuṇḍadhānavagga

3 Mahākaccānattheraapadāna

1 “Padumuttaranāthassa,

padumaṁ nāma cetiyaṁ;

Silāsanaṁ kārayitvā,

suvaṇṇenābhilepayiṁ.

2 Ratanāmayachattañca,

paggayha vāḷabījaniṁ;

Buddhassa abhiropesiṁ,

lokabandhussa tādino.

3 Yāvatā devatā bhummā,

sabbe sannipatuṁ tadā;

Ratanāmayachattānaṁ,

vipākaṁ kathayissati.

4 Tañca sabbaṁ suṇissāma,

kathayantassa satthuno;

Bhiyyo hāsaṁ janeyyāma,

sammāsambuddhasāsane.

5 Hemāsane nisīditvā,

sayambhū aggapuggalo;

Bhikkhusaṅghaparibyūḷho,

imā gāthā abhāsatha.

6 ‘Yenidaṁ āsanaṁ dinnaṁ,

sovaṇṇaṁ ratanāmayaṁ;

Tamahaṁ kittayissāmi,

suṇātha mama bhāsato.

7 Tiṁsa kappāni devindo,

devarajjaṁ karissati;

Samantā yojanasataṁ,

ābhāyābhibhavissati.

8 Manussalokamāgantvā,

cakkavattī bhavissati;

Pabhassaroti nāmena,

uggatejo bhavissati.

9 Divā vā yadi vā rattiṁ,

sataraṁsīva uggato;

Samantā aṭṭharatanaṁ,

ujjotissati khattiyo.

10 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

11 Tusitā hi cavitvāna,

sukkamūlena codito;

Kaccāno nāma nāmena,

brahmabandhu bhavissati.

12 So pacchā pabbajitvāna,

arahā hessatināsavo;

Gotamo lokapajjoto,

aggaṭṭhāne ṭhapessati.

13 Saṅkhittapucchitaṁ pañhaṁ,

Vitthārena kathessati;

Kathayanto ca taṁ pañhaṁ,

Ajjhāsayaṁ pūrayissati’.

14 Aḍḍhe kule abhijāto,

brāhmaṇo mantapāragū;

Ohāya dhanadhaññāni,

pabbajiṁ anagāriyaṁ.

15 Saṅkhittenapi pucchante,

vitthārena kathemahaṁ;

Ajjhāsayaṁ tesaṁ pūremi,

tosemi dvipaduttamaṁ.

16 Tosito me mahāvīro,

sayambhū aggapuggalo;

Bhikkhusaṅghe nisīditvā,

etadagge ṭhapesi maṁ.

17 Paṭisambhidā catasso,

…pe…

kataṁ buddhassa sāsanaṁ”.

18 Itthaṁ sudaṁ āyasmā mahākaccāno thero imā gāthāyo abhāsitthāti.

19 Mahākaccānattherassāpadānaṁ tatiyaṁ.