Therāpadāna 433

Therāpadāna

Ekavihārivagga

1 Ekavihārikattheraapadāna

1 “Imamhi bhaddake kappe,

brahmabandhu mahāyaso;

Kassapo nāma gottena,

uppajji vadataṁ varo.

2 Nippapañco nirālambo,

ākāsasamamānaso;

Suññatābahulo tādī,

animittarato vasī.

3 Asaṅgacitto nikleso,

asaṁsaṭṭho kule gaṇe;

Mahākāruṇiko vīro,

vinayopāyakovido.

4 Uyyutto parakiccesu,

vinayanto sadevake;

Nibbānagamanaṁ maggaṁ,

gatiṁ paṅkavisosanaṁ.

5 Amataṁ paramassādaṁ,

jarāmaccunivāraṇaṁ;

Mahāparisamajjhe so,

nisinno lokatārako.

6 Karavīkaruto nātho,

brahmaghoso tathāgato;

Uddharanto mahāduggā,

vippanaṭṭhe anāyake.

7 Desento virajaṁ dhammaṁ,

diṭṭho me lokanāyako;

Tassa dhammaṁ suṇitvāna,

pabbajiṁ anagāriyaṁ.

8 Pabbajitvā tadāpāhaṁ,

cintento jinasāsanaṁ;

Ekakova vane ramme,

vasiṁ saṁsaggapīḷito.

9 Sakkāyavūpakāso me,

hetubhūto mamābhavī;

Manaso vūpakāsassa,

saṁsaggabhayadassino.

10 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

11 Svāgataṁ vata me āsi,

mama buddhassa santike;

Tisso vijjā anuppattā,

kataṁ buddhassa sāsanaṁ.

12 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

13 Itthaṁ sudaṁ āyasmā ekavihāriko thero imā gāthāyo abhāsitthāti.

14 Ekavihārikattherassāpadānaṁ paṭhamaṁ.