Therāpadāna 76

Therāpadāna

Nāgasamālavagga

Bhisāluvadāyakattheraapadāna

1 “Kānanaṁ vanamogayha,

vasāmi vipine ahaṁ;

Vipassiṁ addasaṁ buddhaṁ,

āhutīnaṁ paṭiggahaṁ.

2 Bhisāluvañca pādāsiṁ,

udakaṁ hatthadhovanaṁ;

Vanditvā sirasā pāde,

pakkāmi uttarāmukho.

3 Ekanavutito kappe,

bhisāluvamadaṁ tadā;

Duggatiṁ nābhijānāmi,

puññakammassidaṁ phalaṁ.

4 Ito tatiyake kappe,

bhisasammatakhattiyo;

Sattaratanasampanno,

cakkavattī mahabbalo.

5 Paṭisambhidā catasso,

…pe…

kataṁ buddhassa sāsanaṁ”.

6 Itthaṁ sudaṁ āyasmā bhisāluvadāyako thero imā gāthāyo abhāsitthāti.

7 Bhisāluvadāyakattherassāpadānaṁ catutthaṁ. Chaṭṭhabhāṇavāraṁ.